FréttirSkrá á póstlista

13.05.2016

Fínasta veiði í byrjun úthafskarfavertíðar

,,Það er búin að vera fínasta veiði þessa fyrstu tvo daga vertíðarinnar. Rússarnir eru búnir að vera hér í einhvern tíma fyrir utan 200 mílna línuna og við mættum nokkrum þeirra á útleiðinni. Ætli að þeir hafi ekki verið að fara inn til löndunar,“ sagði Trausti Egilsson, skipstjóri á Örfirisey RE, er tal náðist af honum á miðunum.

Íslensk skip máttu hefja úthafskarfaveiðar á Reykjaneshryggnum sl. þriðjudag samkvæmt ákvörðun stjórnvalda. Karfakvótinn hefur verið skorinn mikið niður undanfarin ár og þannig nemur kvóti skipa HB Granda ekki nema þriðjungi þess magns sem félagið fékk úthlutað fyrir þremur árum. Trausti segir að harkalegur niðurskurður kvótans sé trúlega ástæðan fyrir því að aðeins þrjú íslensk skip hófu veiðar þegar þær máttu hefjast. Auk Örfiriseyjar voru það Þerney RE og Mánaberg ÓF.

,,Við erum alltaf innan við línuna og höfum ekkert út fyrir að gera. Nú togum við aðallega á 700-850 metra dýpi og þar fáum við betri karfa en ofar. Þessi fiskur er reyndar ekki mjög stór en hentar ágætlega fyrir vinnsluna,“ sagði Trausti Egilsson.

Úthafskarfakvóti skipa HB Granda er um 760 tonn á þessari vertíð. Hann var 850 tonn í fyrra og fyrir þremur árum nam hann 2.388 tonnum.

 

Nýjustu fréttir

Allar fréttir