FréttirSkrá á póstlista

01.03.2016

Engey RE sjósett í Tyrklandi

Nýr ísfisktogari, Engey RE, sem verið er að smíða hjá skipasmíðastöðunni Celiktrans í Tyrklandi fyrir HB Granda, var sjósettur í morgun. Engey er fyrst í röð þriggja ísfisktogara sem HB Grandi hefur samið um smíði á í Tyrklandi. Verður skipið afhent síðar á þessu ári. Akurey AK verður afhent næsta vor en þriðji og síðasti togarinn, Viðey RE, verður afhentur á haustmánuðum 2017.

Viðstaddir sjósetninguna í fallegu veðri í morgun voru m.a. Torfi Þ. Þorsteinsson, deildarstjóri botnfisksviðs HB Granda, Loftur Bjarni Gíslason, útgerðarstjóri ísfiskskipa félagsins, og Friðleifur Einarsson, skipstjóri á Ásbirni RE sen verður skipstjóri á Engey.

Engey RE er 54,75 metrar að lengd og 13,5 metrar að breidd. Aðalvélin er af gerðinni MAN 6L27/38 og er skráð afl hennar 1.790 kW við 800 snúninga á mínútu. Niðurfærslugír er frá Reintjes með PTO fyrir ásrafala. Skrúfa er frá MAN og er hún 3.800 mm í þvermál. Vélin er útbúin með mengunarvarnarbúnaði af gerðinni SCR Catalysator. Ljósavélar eru tvær og eru þær af gerðinni MAN D2840 LE 301. Afl hvorrar um sig er 443kW.  Spilkerfið er frá Naust Marine og eru allar vindur rafknúnar. Bógskrúfa er frá Brunvoll og er hún 300 kW. Millidekks- og lestarbúnaður verður smíðaður hjá Skaganum 3X og verður hann settur í skipið á Íslandi.

Hönnuður skipsins er Alfreð Tulinius skipatæknifræðingur hjá Nautic ehf.

 


Fleiri myndir með frétt

Nýjustu fréttir

Allar fréttir