FréttirSkrá á póstlista

29.10.2015

Ný flokkunarstöð opnuð við Norðurgarð

Nýrri sorpflokkunarstöð HB Granda við Norðurgarð verður gefið nafn og hún formlega opnuð við athöfn sem haldin verður nk. mánudag. Við sama tækifæri verður nýtt verkstæði og umbúðageymsla í nýbyggingu á Norðurgarði tekin í notkun.

Reiknað er með að um 200 manns verði viðstaddir opnunarathöfnina sem hefst kl. 15:30 á mánudag. Dagskráin er í stuttu máli þannig að Vilhjálmur Vilhjálmsson, forstjóri HB Granda mun bjóða gesti velkomna. Því næst mun Sigrún Magnúsdóttir umhverfisráðherra flytja ávarp. Lýst verður úrslitum í samkeppni um nafn á flokkunarstöðina sem staðið hefur yfir meðal starfsmanna undanfarnar vikur. Veitt verða verðlaun fyrir bestu tillöguna. Í framhaldi af því mun Vilhjálmur veita Bláa hernum fjárstyrk frá HB Granda til frekari hreinsunarstarfa en þau samtök hafa, sem kunnugt er, látið mikið að sér kveða við hreinsun strandlengjunnar mörg undanfarin ár. Loks verða nýja verkstæðisbyggingin og umbúðageymslan skoðuð og þar verður boðið upp á veitingar frá Norðanfiski sem er eitt af dótturfyrirtækjum HB Granda.

Þess má geta að tilgangurinn með starfrækslu sérstakrar sorpflokkunarstöðvar á lóð HB Granda er að safna saman sorpi sem fellur til á athafnasvæði félagsins í Reykjavík og þeim skipum sem landa þar. Markmiðið er að draga verulega úr urðun sorps og auka hlutfall  til endurvinnslu.

Með tilkomu flokkunarstöðvarinnar er öllu sorpi sem fellur til í landvinnslu, verkstæði, skrifstofum, skipum og frystigeymslu safnað saman á einn stað þar sem nákvæm flokkun fer fram. Fyrirmynd af sorpflokkunarstöðinni er flokkunarstöð sem starfrækt er hjá HB Granda á Vopnafirði. 

Nýjustu fréttir

Allar fréttir