FréttirSkrá á póstlista

20.10.2015

Á leið til Vopnafjarðar með 660 tonn af síld

Von er á Lundey NS til Vopnafjarðar eftir miðnætti með um 660 tonn af íslenskri sumargotssíld. Aflinn fékkst í fjórum holum vestur af Garðsskaga og í Jökuldýpi um helgina og í gær.

,,Við tókum fyrsta holið um hádegisbilið á laugardag í skítaveðri. Það var svo ekki fyrr en í gær að komið var þokkalegasta veður og þá fengum við sæmilegan afla,“ segir Albert Sveinsson skipstjóri en er rætt var við hann var Lundey stödd út af Stokksnesi á leið til Vopnafjarðar.

Að sögn Alberts hefur síldar orðið vart víða vestur af landinu en hann segir lóðningarnar ekki sterkar á hverjum stað.

,,Þetta er frekar dapurt enn sem komið er en nú er skipunum að fjölga á miðunum og vonandi kemst betri mynd á veiðina fljótlega. Síldin er reyndar stór og góð og ætti að henta vel til vinnslu en það myndi henta okkur betur ef veiðin væri meiri,“ segir Albert Sveinsson.

 

Nýjustu fréttir

Allar fréttir