FréttirSkrá á póstlista

20.08.2015

Leita að makrílnum fyrir austan

,,Það er búið að vera hálf undarlegt ástand á makrílnum í þessari veiðiferð. Hann virðist hafa dreift sér og menn hafa leitað víða fyrir sér. Núna erum við t.d. staddir rúmlega 60 sjómílur frá landi eða á svipuðum slóðum og eitt skipið fékk ágætan afla í gærkvöldi. Við erum búnir að toga síðan í morgun og það er fyrst nú upp úr hádeginu sem við erum farnir að fá innkomu í trollið.“

Þetta sagði Albert Sveinsson skipstjóri á Lundey NS en hann var þá að taka síðasta hol veiðiferðarinnar djúpt undan SA-landi. Aflinn fyrir holið var kominn í 380 tonn og sagðist Albert reikna með því að verða kominn til Vopnafjarðar einhvern tíman í nótt.

,,Við hófum veiðar í Litladjúpi en þar og í nágrenni við Hvalbakshallið hafði makrílveiðin verið góð að undanförnu. Svo brá hins vegar við, að þessu sinni, að skipin fundu ekki mikið af makríl og tíminn hefur því farið í að leita mjög víða. Ef farið er of grunnt er alltaf hætta á að rekast á síld, sem við viljum ekki veiða núna, og við fengum t.d. stóra og fallega norsk-íslenska síld í gærdag. Við færðum okkur því hingað út í gærkvöldi og vonandi skilar það okkur einhverjum makrílafla til viðbótar áður en við hífum,“ sagði Albert Sveinsson.

 

Nýjustu fréttir

Allar fréttir