FréttirSkrá á póstlista

09.03.2015

HB Grandi styður starfsfólk til þátttöku í Mottumarsi

Að frumkvæði stjórnenda HB Granda hefur verið ákveðið að styrkja átak Krabbameinsfélags Íslands, Mottumars – karlar og krabbamein. Það er gert með því að virkja starfsfólk félagsins, rúmlega 900 manns, með framlagi upp á 2.000 krónur fyrir hvern starfsmann sem tekur þátt í Mottumarsi að þessu sinni.

Svo vill til að umræddu átaki var að þessu sinni hrundið úr vör um borð í ísfisktogaranum Helgu Maríu AK. Við það tækifæri afhjúpuðu Kristján Þór Júlíusson, heilbrigðisráðherra, og Jens Garðar Helgason, formaður Samtaka fyrirtækja í sjávarútvegi (SFS), mynd af veglegu yfirvararskeggi sem komið hefur verið fyrir á brú skipsins. Svo vill til að SFS verða styrktaraðili Mottumars næstu þrjú árin og var samningur þar að lútandi undirritaður í Saltfisksetrinu í Grindavík fyrir skömmu.

Vilhjálmur Vilhjálmsson, forstjóri HB Granda, telur verkefnið brýnt og hann segir að félagið vilji leggja sitt af mörkum til að sporna við þeim vágesti sem krabbamein virkilega er.
„Við hjá HB Granda erum vissulega stolt yfir því að Helga María AK hafi fengið snyrtilega mottu á stýrishúsið. Við viljum bæta við og hvetja starfsfólk okkar til þátttöku í Mottumarsi. Af því tilefni leggjum við söfnuninni til 2.000 króna áheit fyrir hvern starfsmann sem skráir sig til þátttöku. Forvarnir og heilsuvernd eru okkur ofarlega í huga og má í því sambandi nefna að við höfum meðal annars boðið starfsfólki okkar í árlega heilsufarsskoðun. Sú skoðun hefur þó ekki falið í sér ristilskoðun, hvað svo sem síðar verður,“ segir Vilhjálmur Vilhjálmsson.

Hægt er að styrkja lið HB Granda í Mottumars með því að smella hér

Nýjustu fréttir

Allar fréttir