FréttirSkrá á póstlista

11.01.2015

Faxi RE kominn með 380 tonn af loðnu

Rólegt hefur verið yfir loðnuveiðum norður af landinu frá því að farið var til loðnuleitar eftir áramótin. Að sögn Alberts Sveinssonar, skipstjóra á Faxa RE, er loðnan dreifð og lóðningar ekki þéttar. Faxi er að veiðum um 90 mílur norður af Rauðanúpi og var aflinn nú síðdegis kominn í um 390 tonn eftir þrjú hol.

,,Við tókum fyrsta holið í gær og fengum þá þokkalegan afla. Síðan var aftur togað í nótt en með minni árangri og við vorum svo að ljúka við þriðja holið fyrir stundu. Mest höfum við togað í um sex tíma í einu,“ segir Albert en að hans sögn er loðnan ágætlega stór, eða um 42 stykki í kílóinu miðað við prufu frá því í gær, og lítið er um átu í loðnunni.

Auk Faxa voru hin tvö uppsjávarveiðiskip HB Granda, Ingunn AK og Luney NS, á svipuðum slóðum en þar voru einnig Sigurður VE og Heimaey VE.

,,Ingunn er að klára fyrsta holið en það er sama staða hjá hinum skipunum og okkur. Það er rólegt yfir aflabrögðunum. Það væri ákjósanlegt að ná 600 til 700 tonna afla áður en farið verður til löndunar á Vopnafirði og vonandi tekst okkur að ná því sem upp á vantar í kvöld og á morgun. Á þriðjudag er spáð brælu en annars er búið að vera besta veður hér á miðunum frá því í gær,“ sagði Albert Sveinsson.

Nýjustu fréttir

Allar fréttir