FréttirSkrá á póstlista

31.03.2014

Stækkun fiskmjölsverksmiðjunnar á Vopnafirði miðar vel

Nú er unnið að stækkun fiskmjölsverksmiðju HB Granda á Vopnafirði og er vonast til að því verki ljúki innan skamms. Starfsleyfi er fyrir 850 tonnum af hráefni á sólarhring eins og staðan er nú en eftir breytingarnar verður framleiðslugetan um 1.150 tonn á sólarhring.

,,Þetta er mjög stór framkvæmd. Við bætum við nýjum loftþurrkara, mjölvindu, mjölkæli, eimingartækjum og pressu. Vegna þessa hefur þurft að gera ýmsar breytingar en við búumst við að verksmiðjan, með þeim búnaði sem var fyrir stækkunina, verði orðin klár til að taka á móti kolmunna nk. miðvikudag og að ekki líði margir dagar eftir það þar til að nýi búnaðurinn verði tekinn í notkun,“ segir Sveinbjörn Sigmundsson, verksmiðjustjóri HB Granda á Vopnafirði.

Að sögn Sveinbjörns hefur Héðinn hf. haft veg og vanda af stækkun verksmiðjunnar á Vopnfirði en auk þess hafa ýmsir undirverktakar komið að verkefninu. Þar má nefna Elrúnu, sem séð hefur um alla rafmagnsvinnu, og járnsmíða- og trésmíðaverkstæðin á Vopnafirði. Þegar mest hefur verið hafa um 20 iðnaðarmenn starfað við stækkun verksmiðjunnar.

Undanfarin ár hefur fiskmjölsverksmiðja HB Granda nýtt rafskautaketil til framleiðslunnar í stað hinna gömlu olíukatla og hefur það haft í för með sér sparnað á orkukostnaði og dregið úr innflutningi á erlendu jarðefnaeldsneyti. Verksmiðjan nýtir innlendan orkugjafa, svokallaða ótrygga orku, en sá galli er á gjöf Njarðar að ef ekki er nægilega raforku að fá á hverjum tíma þá verður að nýta olíu til orkuframleiðslu. Raforkan, sem miðlað er um byggðalínu, hefur reynst af skornum skammti í vetur en Sveinbjörn segir að sá skortur hafi ekki enn haft áhrif á verksmiðjuna á Vopnafirði.

,,Megin ástæðan er sú að starfsemin hefur ekki verið mikil. Langstærstur hluti loðnuaflans fór í frystingu fyrir manneldi og hér á Vopnafirði voru ekki brædd nema um 600 tonn af loðnu og því sem féll til við vinnsluna í fiskiðjuverinu. Hins vegar er beygur í manni fyrir kolmunnavertíðina sem nú er hafin. Vatnsstaðan í öllum uppistöðulónum er í lágmarki og jafnvel þótt staðan þar væri betri þá er það byggðalínan sem er vandamálið. Hún ræður einfaldlega ekki við að flytja nægilega mikið af raforku út í hinar dreifðu byggðar landsins,“ segir Sveinbjörn Sigmundsson.

 

Nýjustu fréttir

Allar fréttir