FréttirSkrá á póstlista

13.01.2014

Fyrsta veiðiferð Helgu Maríu AK sem ísfisktogari

Það voru tímamót í útgerðarsögu togarans Helgu Maríu AK um liðna helgi en þá var farin fyrsta veiðiferð skipsins sem ísfisktogari. Helga María, sem áður hét Haraldur Kristjánsson HF, var ásamt systurskipinu Sjóla HF einn af fyrstu frystitogurunum sem smíðaðir voru fyrir Íslendinga og í ár verða liðin 25 ár síðan þessi systurskip komu til landsins.

Sú ákvörðun var tekin í byrjun síðasta árs að láta breyta Helgu Maríu í ísfisktogara og helgaðist sú ákvörðun stjórnar HB Granda m.a. af því að ákveðið hefur verið að leggja aukna áherslu á landvinnslu botnfisks hjá félaginu en draga úr sjófrystingu. Samið var við skipasmíðastöð í Gdansk í Póllandi að breyta skipinu og lauk því verki í nóvember sl. Helga María kom til landsins í lok þess mánaðar og þá tók við vinna íslenskra verktaka sem sáu um niðursetningu á öllum búnaði á millidekki skipsins og annan frágang.

Að sögn Eiríks Ragnarssonar skipstjóra, sem verið hefur í áhöfn skipsins allt frá því að það kom til landsins árið 1989, fyrst sem 1. stýrimaður og afleysingaskipstjóri og síðar sem skipstjóri frá árinu 1995, var brottför úr höfn í Reykjavík síðdegis sl. laugardag.

,,Öllum prófunum í landi er lokið og nú verður búnaðurinn reyndur á sjó,“ segir Eiríkur en að hans sögn verður fyrsta veiðiferðin nokkurs konar prufutúr. Fyrir vikið verða 17 skipverjar um borð auk fjögurra tæknimanna en miðað er við að 15 manns verði í áhöfn hverju sinni framvegis. Eiríkur segir að veðurspáin sé slæm fyrir næstu daga og það muni því reyna á skip og áhöfn svo ekki sé talað um tæknimennina.

Á millidekki Helgu Maríu hefur verið komið fyrir mjög fullkomnum búnaði sem miðar að því að hráefnisgæðin verði sem allra mest. Fiskurinn er blóðgaður og slægður um leið og hann berst inn á millidekkið og þaðan liggur leið hans í blóðgunarkar og síðan í kar þar sem fiskurinn er kældur niður undir 0°C og er gert ráð fyrir að það geti tekið um 40 mínútur. Kerfið er tvöfalt og afkastageta þess um 16 tonn á klukkustund. Eftir kælingu er hægt að flokka fiskinn í fjóra mismunandi stærðarflokka og honum er síðan komið fyrir í fiskkörum með ískrapa í kælilestinni.

 

Nýjustu fréttir

Allar fréttir