FréttirSkrá á póstlista

07.12.2013

Þokkaleg veiði í Breiðamerkurdjúpi en síldin er í smærra lagi

Vinnsla á síld ætti að geta hafist nú síðdegis í uppsjávarfrystihúsi HB Granda á Vopnafirði eftir langt hlé. Von var á Lundey NS til hafnar með um 700 tonna afla um kl. 15 og Ingunn AK, sem er með rúmlega 900 tonna afla, er væntanleg tveimur til þremur tímum seinna.

Engin síldveiði hefur verið á veiðisvæðinu í Breiðafirði sl. hálfan mánuð eða svo og varð það til þess að skipin fluttu sig austur í Breiðamerkurdjúp þar sem verið hefur þokkaleg veiði sl. tvo sólarhringa. Að sögn Arnþórs Hjörleifssonar, skipstjóra á Lundey, töldu menn að fullreynt væri í bili í Breiðafirðinum.

,,Fyrir utan kolvitlaust tíðarfar varð ekkert vart við síld þá daga sem viðraði til veiða. Við vorum í vari inni á Grundarfirði í mestu ótíðinni og svo á Akranesi í nokkra daga áður en við héldum hingað austur. Það er erfitt að átta sig á því hve mikið er af síld í Breiðamerkurdjúpinu vegna þess hve síldin er dreifð og ekkert um góðar lóðningar. Þá er síldin mun smærri en í Breiðafirðinum og meðalvigtin hjá okkur núna er á að giska um 270 grömm,“ segir Arnþór en að hans sögn hættu öll skipin veiðum í gærkvöldi eftir að veður versnaði til muna.

Arnþór segir að óvissa ríki um framhaldið. Öll skipin hafa verið á nótaveiðum utan hvað Vilhelm Þorsteinsson EA hafi reynt veiðar í flottroll nokkuð fyrir utan svæðið þar sem nótaveiðarnar voru stundaðar.

,,Mér skilst að hann hafi fengið 150 tonna hol af um 300 gramma síld og e.t.v. bendir það til þess að vænlegra sé að reyna togveiðar en nótaveiðar,“ segir Arnþór Hjörleifsson.
Í samtali við Guðlaug Jónsson, skipstjóra á Ingunni AK, kom fram að stærri nót hafi verið tekin um borð í Reykjavík áður en haldið var austur.

,,Við vorum komnir í Breiðamerkurdjúpið í fyrrakvöld. Lóðningar voru lélegar og ég hef á tilfinningunni að þar sé ekki mikið magn af síld. Við létum reka í gærdag en vorum svo að veiðum þar fram eftir kvöldi en þá var kominn kaldaskítur. Síldin er mun smærri en í Breiðafirðinum og meðalvigtin hjá okkur er um 250 grömm ef marka má niðurstöður þeirra mælinga sem gerðar voru,“ segir Guðlaugur Jónsson.

 

Nýjustu fréttir

Allar fréttir