FréttirSkrá á póstlista

06.06.2013

Úthafskarfakvótinn í höfn

Öllum fjórum frystitogurum HB Granda, sem hófu úthafskarfaveiðar þann 10. maí sl., tókst að ná kvótum sínum fyrir sjómannadaginn. Kvótinn var reyndar með minnsta móti í ár eða aðeins 650 tonn af karfa upp úr sjó á hvert skip eða samtals 2.600 tonn.

Mjög góð veiði var á lögsögumörkunum á Reykjaneshryggnum að þessu sinni á meðan veiðum íslenskra skipa stóð. Samkvæmt íslenskri reglugerð mega skipin ekki hefja veiðar fyrr en 10. maí en fyrir þann tíma höfðu m.a. rússneskir togarar fengið mjög góðan afla. Reyndar svo góðan að þeir voru búnir að veiða þau 15% af heildarkvóta Rússa, sem heimilt var að veiða fram til 10. maí, einum tveimur dögum fyrr.

Úthafskarfavertíðin í fyrra var íslenskum útgerðum og sjómönnum veruleg vonbrigði. Mjög góð veiði hafði verið hjá Rússunum í um hálfan mánuð áður en íslensku skipin máttu hefja veiðar. Síðan hækkaði sjávarhitinn og við það virðist karfinn hafa dreift sér og þurftu íslensku áhafnirnar að hafa mikið fyrir veiðunum. Heildarkvótinn var í framhaldinu skorinn niður en miðað við aflabrögðin í maímánuði í ár virðist ástand stofnsins vera betra en margir hugðu.

 

Nýjustu fréttir

Allar fréttir