FréttirSkrá á póstlista

23.04.2013

Tímamót í landvinnslu á Akranesi

Í dag var undirritaður samningur á milli HB Granda og Völku á sjávarútvegssýningunni í Brussel um kaup á röntgenstýrðri beinaskurðarvél til skurðar á þorskflökum. Þetta er fyrsta vél sinnar tegundar í heiminum og var hún sýnd í fyrsta skipti opinberlega á sýningunni.

HB Grandi tók þátt í að þróa fyrstu beinaskurðarvélina með Völku og hefur sú vél verið í notkun í fiskiðjuveri HB Granda í Reykjavík frá því í september í fyrra. Sú vél er notuð til að skera beingarð úr karfaflökum auk þess sem hnakkabitar eru skornir sjálfvirkt í vélinni.

Nýju vélinni verður komið fyrir í fiskiðjuveri HB Granda á Akranesi í sumar og verður hún notuð til að skera beingarð úr þorskflökum og skera flakið í bita eftir óskum kaupenda. Ákveðið hefur verið að auka þorskvinnslu á Akranesi og mun nýja vélin stuðla að auknum afköstum og nýtingu í bitaskurði. HB Grandi og Valka eru saman í þróunarverkefni sem miðar að því bæta nýtingu enn frekar, með svokölluðum hallandi skurði, en það verkefni er styrkt af AVS sjóðnum og Tækniþróunarsjóði.

Þess má geta að HB Grandi hlaut nýverið Útflutningsverðlaun forseta Íslands og Valka hlaut í síðustu viku Nýsköpunarverðlaunin sem veitt eru af Rannís, Nýsköpunarmiðstöð Íslands, Nýsköpunarsjóði og Íslandsstofu.

 

Nýjustu fréttir

Allar fréttir