FréttirSkrá á póstlista

13.12.2012

Tveir til þrír hnúfubakar í nótinni í einu!

,,Það er búin að vera óhemju netavinna í þessari veiðiferð. Rifið í svo til hverju kasti og nánast alltaf vegna þess að hvalir höfðu lent í nótinni,“ segir Halldór Jónasson, annar stýrimaður á Lundey NS, en skipið er nú á leið til Vopnafjarðar með um 650 tonn af loðnu eftir langa og stranga veiðiferð.

Svo sem fram hefur komið í fréttum hafa hnúfubakavöður á loðnumiðunum norður af Vestfjörðum gert sjómönnum lífið leitt síðustu dagana en sennilega hafa fáir farið jafn illa út úr ágangi hvalanna og áhöfnin á Lundey. Að sögn Halldórs rifnaði nótin a.m.k. fjórum til fimm sinnum vegna þess að hnúfubakar, sem voru að eltast við loðnu, lentu inni í henni þegar kastað var. Erfitt er að forðast hvalina því loðnan hefur aðeins gefið sig til á meðan myrkurs nýtur.

,,Menn verða ekkert varir við þetta fyrr en nótin er að lokast. Þá heyrir maður blásturinn í hnúfubökunum og síðan láta þeir sig vaða út og rífa allt í hengsli. Ef við vorum svo heppnir að fá ekki hval í nótina þá komu þeir stundum utan á pokann. Sennilega hefur forvitnin ein búið þar að baki,“ sagði Halldór sem býst við því að Lundey komi til hafnar á Vopnafirði seinni hluta nætur eða snemma í fyrramálið.

Af hinum uppsjávarveiðiskipum HB Granda er það að frétta að Faxi RE kom til Vopnafjarðar í morgun með um 1.100 tonn af loðnu og Ingunn AK lagðist þar að bryggju um miðnætti sl. með svipaðan afla. Þar sem veðurútlit er slæmt næstu daga hefur verið ákveðið að gera hlé á loðnuveiðum skipa HB Granda fram yfir hátíðar.

 

Nýjustu fréttir

Allar fréttir