FréttirSkrá á póstlista

29.11.2012

Loðnufrysting hafin á Vopnafirði

Loðnufrysting hófst í uppsjávarfrystihúsi HB Granda á Vopnafirði í morgun og mun þetta vera fyrsti loðnuaflinn sem fer til landvinnslu á vertíðinni. Verið er að vinna úr tæplega 600 tonna loðnuafla sem Ingunn AK kom með til hafnar snemma í morgun og að sögn Magnúsar Róbertssonar vinnslustjóra hentar megnið af aflanum í frystingu til manneldis.

,,Vinnslan fór mjög vel af stað. Loðnan er stór og góð og í morgun vorum við að vinna loðnu úr fyrstu köstum veiðiferðarinnar. Stærsta loðnan fer í flokkinn 25 til 35 stykki í kílói en ætli meðaltalið úr umræddum köstum sé ekki nálægt 33-34 stykki í þeim stærðarflokki. Hins vegar vitum við að loðnan sem fékkst í lok veiðiferðarinnar var heldur smærri en það á eftir að koma í ljós hvernig hún flokkast,“ segir Magnús en að hans sögn hefur flokkun loðnunnar gengið mjög vel og nú síðdegis var nýtingin til frystingar mjög góð.

Að sögn Magnúsar má reikna með því að miðað við núverandi gang í vinnslunni þá verði fryst um 400 tonn af loðnu á sólarhring. Um 65 manns vinna við frystinguna á vöktum. Aflinn úr Ingunni ætti að duga fram á morgundaginn en Lundey NS er á miðunum eftir að hafa leitað hafnar í gær vegna veðurs og segir Magnús að skipið hafi verið komið með um 360 tonn af loðnu í morgun.

 

Nýjustu fréttir

Allar fréttir