FréttirSkrá á póstlista

30.04.2012

Náum vonandi að fylla í dag

Faxi RE er nú í síðustu hreinu kolmunnaveiðiferð ársins og er skipið statt í færeyskri lögsögu um 70 mílur suður af Suðey. Aflinn í morgun var kominn í rúmlega 1.200 tonn og sagðist Ebenezer Guðmundsson, sem er 1. stýrimaður í túrnum, vonast til að skipverjar næðu að fylla í dag. Burðargeta Faxa er að hámarki um 1.550 tonn þannig að góðar líkur eru því á að stefnan verði tekin á Vopnafjörð síðar í dag.

Að sögn Ebenezers hefur veiðisvæðið færst norðar síðustu dagana.

,,Í síðustu veiðiferð vorum við að veiðum syðst í færeysku lögsögunni, fyrir sunnan svokallað skiljusvæði, en nú er veiðin þar dottin niður og kolmunninn er kominn norður á umrætt svæði. Þar verðum við að nota seiða- og smáfiskaskilju og aflinn er minni fyrir vikið,“ segir Ebenezer en er rætt var við hann í morgun var verið að taka sjötta hol veiðiferðarinnar. Sagðist hann vonast til að hægt yrði að fylla í dag þannig að hægt yrði að leggja af stað áleiðis til Vopnafjarðar síðar í dag eða í kvöld. Gangi það eftir ætti skipið að geta verið komið til hafnar á Vopnafirði nk. miðvikudag en þangað er um 35-38 tíma sigling frá veiðisvæðinu.

Nokkur fjöldi skipa er á kolmunnaveiðum suður af Færeyjum. Mest er um rússnesk skip en þar eru einnig færeysk skip og nokkur íslensk skip og þá aðallega skip þar sem aflinn er unninn um borð.

Fyrir veiðiferðina voru eftirstöðvar kolmunnakvóta skipa HB Granda um 2.500 tonn en heildaraflinn á vertíðinni stóð þá í rúmum 10.000 tonnum. Horfur eru því að hægt verði að nýta um 1.000 tonna kolmunnakvóta fyrir meðafla á síldar- og makrílveríðinni í sumar eða færa eftirstöðvarnar yfir á næsta ár.

 

Nýjustu fréttir

Allar fréttir