FréttirSkrá á póstlista

17.04.2012

Vænn kolmunni á stóru svæði

Faxi RE kom til hafnar á Vopnafirði í morgun með fullfermi eða um 1.450 til 1.500 tonn af kolmunna. Aflinn fékkst syðst í færeysku lögsögunni og að sögn Hjalta Einarssonar, sem var skipstjóri í veiðiferðinni, voru skip víða að veiðum á þessu svæði. Kolmunninn virðist ekki þétta sig í torfum og algengur afli eftir níu til tíu tíma hol er um 300 til 350 tonn.

,,Við hófum veiðar eftir miðnætti 13. apríl sl. og framan af tókum við fremur stutt hol því þá var stefnt að því að landa aflanum til frystingar í Færeyjum. Frá því var horfið vegna erfiðleika með landanir og við lengdum því holin og aflinn var ágætur. Kolmunninn er vænn og meðalþyngdin hjá okkur er um 160 til 170 grömm sem þykir gott,“ segir Hjalti.

Frá veiðisvæðinu til Vopnafjarðar er um 430 sjómílna leið og heimsiglingin tók um 35 tíma að sögn Hjalta. Gott veður var á leiðinni og siglingartíminn því skemmri en annars hefði verið. Von er á Ingunni AK til Vopnafjarðar í kvöld með fullfermi af kolmunna en veiðar skipsins töfðust eftir að flotttrollið skemmdist. Það gerðist í kjölfar þess að toghlerar rússnesks togara rákust í troll Ingunnar. Svo vel vildi til að Lundey NS, sem er væntanleg með fullfermi til Vopnafjarðar í fyrramálið, var skammt undan og um borð var aukatroll sem skipverjar á Ingunni gátu sett undir og notað til að ljúka veiðum.

 

Nýjustu fréttir

Allar fréttir