FréttirSkrá á póstlista

19.04.2011

HB Grandi tekur þátt sjávarútvegssýningunni í Brussel í sjöunda sinn

Nú stendur yfir undirbúningur vegna þátttöku HB Granda í sjávarútvegssýningunni European Seafood Exposition (ESE) sem haldin verður í Brussel í Belgíu dagana 3. til 5. maí nk., samhliða sýningunni Seafood Processing Europe (SPE). HB Grandi hefur tekið þátt í ESE-sýningunni frá árinu 2005 og verður þetta í sjöunda skiptið sem starfsemi og afurðir félagsins verða kynntar á eigin sýningarbás.

Sjávarútvegssýningarnar í Brussel verða svo sannarlega í sviðsljósinu í byrjun maí. Búist er við því að gestir frá meira en 150 þjóðlöndum sæki sýningarnar heim. Þær eru jafnan vettvangur alls hins besta og framsæknasta sem sjávarútvegsfyrirtæki heimsins og fyrirtækja, sem þjónusta sjávarútveginn, hafa upp á að bjóða. Í ár taka rúmlega 700 fyrirtæki þátt í ESE-sýningunni og sýnendur á SPE-sýningunni, sem er vettvangur véla- og tækjaframleiðenda, eru rúmlega 200 talsins frá 22 löndum.

Að sögn Svavars Svavarssonar, markaðsstjóra HB Granda, hefur þátttaka í sýningunnií Brussel verið stór og vaxandi liður í markaðsstarfi félagsins en auk þess sem tækifæri gefst til að ná til nýrra viðskiptavina þá er ekki síður mikilvægt að hitta núverandi samstarfsaðila sem margir hverjir hafa verið í viðskiptum við HB Granda um árabil..

,,Sjávarútvegssýningin í Brussel er mikilvægasta sýning sinnar tegundar og sú langstærsta sem haldin er í heiminum í dag. Reynsla okkar af þátttöku í ESE-sýningunni er mjög góð og við verðum nú með sjöunda árið í röð,” segir Svavar en til marks um áhersluna sem félagið leggur á þessa sýningu má nefna að alls munu 15 starfsmenn HB Granda verða á sýningarbásnum í Brussel og munu þeir nota tækifærið til að ræða við kaupendur á sjávarfangi , afla nýrra viðskiptasambanda og treysta samstarfið við eldri viðskiptavini.

,,Við höfum áður stofnað til nýrra viðskiptasambanda í Brussel eða í kjölfar sýninganna þar og væntum þess að svo verði einnig að þessu sinni,” segir Svavar Svavarsson en hann og hans fólk mun standa vaktina á sýningarbás HB Granda. Hann verður í sýningarhöll 6 og er númerið 839-1.

 

Nýjustu fréttir

Allar fréttir