FréttirSkrá á póstlista

18.10.2010

Veiðar á íslensku sumargotssíldinni að hefjast

Ingunn AK fer til veiða á íslenskri sumargotssíld síðar í dag en skipið er nú í Reykjavíkurhöfn þar sem verið er að taka síldarnót um borð. Mikil óvissa hefur verið um það hvort ástand síldarstofnsins væri með þeim hætti að kvóti yrði gefinn út á þessu hausti en samkvæmt ákvörðun sjávarútvegsráðherra hefur nú verið gefinn út 15.000 tonna byrjunarkvóti. Þar af koma um 1.800 tonn í hlut skipa HB Granda.

Að sögn Vilhjálms Vilhjálmssonar, deildarstjóra uppsjávarsviðs HB Granda, var ákveðið að senda Ingunni til veiða á íslensku sumargotssíldinni þar sem að veðurspáin er óhagstæð fyrir austan landið þar sem skip HB Granda hafa stundað veiðar á norsk-íslensku síldinni. Spáin fyrir vestanvert landið er hins vegar hagstæð en vitað er til þess að töluvert magn af íslensku sumargotssíld heldur sig inni á Breiðafirði um þessar mundir.

Ingunn AK kom til hafnar í Reykjavík í gær en vinnslu á um 1.000 tonna afla skipsins lauk á Vopnafirði sl. laugardag. Von er á Lundey NS til Vopnafjarðar í dag með rúmlega 500 tonna afla og Faxi RE er á leiðinni með um 750 tonn af síld og ætti að koma til hafnar í fyrramálið. Skipin hafa verið við veiðar í Síldarsmugunni, um 300 sjómílur frá Vopnafirði, og hefur síldin fjarlægst íslensku lögsöguna jafnt og þétt síðustu daga. Alls eiga skip HB Granda nú óveidd um 1.400 tonn af norsk-íslenska síldarkvótanum og að sögn Vilhjálms mun framvinda mála næstu daga skera út um það hvort veiðunum verði haldið áfram eða hvort eftirstöðvar kvótans verða færðar yfir á næsta ár.

 

Nýjustu fréttir

Allar fréttir