FréttirSkrá á póstlista

23.08.2010

Síldveiðin að færast yfir í Síldarsmuguna

Skip HB Granda eiga nú óveidd um 17.000 tonn af veiðiheimildum ársins hvað varðar norsk-íslensku síldina og eftirstöðvar makrílkvótans eru um 3.500 tonn. Að sögn Vilhjálms Vilhjálmssonar, deildarstjóra uppsjávarsviðs HB Granda, er erfitt að segja til um það hve veiðiheimildirnar muni duga langt fram á haustið en vonir standi til að hægt verði að halda veiðum gangandi fram í byrjun október hið minnsta.

Hægst hefur á veiðunum upp á síðkastið og að sögn Vilhjálms hafa aflabrögðin síðustu vikuna verið fremur dræm. Fyrir vikið hefur ekki verið hægt að halda uppi fullri vinnslu í uppsjávarfrystihúsi félagsins á Vopnafirði. Góður gangur hefur þó verið í veiðunum í sumar og á Vopnafirði er nú búið að frysta rúmlega 8.000 tonn af síldar- og makrílafurðum og er afurðamagnið svipað í hvorri tegund.

Ljóst virðist að síldin er nú í auknum mæli að ganga úr íslenskri lögsögu norðaustur í Síldarsmuguna og lengst hafa skipin orðið að sækja aflann um 270 sjómílur ANA af Vopnafirði. Aðstæður á miðunum hafa verið frekar erfiðar síðustu dagana, kaldaskítur og töluverður tími hefur farið í að leita að síld í veiðanlegu magni. Makríll veiðist sem meðafli og hefur hlutfall hans í aflanum verið um 20% að jafnaði frá því eftir verslunarmannahelgina.

Að sögn Vilhjálms kom Lundey NS inn til löndunar í gær með rúmlega 500 tonn af síld og makríl og fór skipið aftur til veiða nú í morgun. Faxi RE og Ingunn AK eru á miðunum sem nú eru um 200 sjómílur norðaustur af Vopnafirði. Faxi var kominn með um 350 tonn í morgun en þá var verið að taka síðasta holið. Von er á skipinu til Vopnafjarðar í fyrramálið. Ingunn var í morgun komin með um 300 tonna afla.

Óvissa ríkir um framhaldið eftir að veiðum á norsk-íslensku síldinni og makrílnum lýkur. Hafrannsóknastofnun telur ástand íslensku sumargotssíldarinnar er ekki nægilega gott til þess að rétt sé að gefa út kvóta en á undanförnum árum hafa veiðar á íslensku síldinni hafist á haustmánuðum og staðið fram yfir áramót. Vonir eru þó bundnar við að gefinn verði út einhver rannsóknakvóti en ekkert liggur fyrir um það á þessari stundu.

Nýjustu fréttir

Allar fréttir