FréttirSkrá á póstlista

11.05.2010

HB Grandi er bakhjarl sjómannalagakeppninnar á Rás 2

Ákveðið hefur verið að HB Grandi verði bakhjarl sjómannalagakeppni Rásar 2 og Hátíðar hafsins í ár. Umrædd keppni hefur vakið verðskuldaða athygli undanfarin ár enda hafa nokkur sigurlaganna náð miklum vinsældum. Í fyrra var það lagið Sófasjómaðurinn með Skapta Ólafs og Sniglabandinu, sem bar sigur úr býtum. Faðmurinn í flutningi Ragnars Bjarnasonar var sigurlag síðasta árs en árið áður voru það Ljótu hálfvitarnir sem sigruðu með laginu Sonur hafsins. 

Að sögn Böðvars Jónssonar, markaðsfulltrúa hjá RÚV, hófst kynning á keppninni í ár í lok aprílmánaðar. Þau skilyrði eru sett að innsend lög séu frumsamin og við frumorta íslenska texta. Skilafrestur er til 25. maí nk. Dómnefnd verður skipuð starfsmönnum á Rás 2. Þau lög sem komast í úrslit verða kynnt á Rás 2 í fyrstu viku júnímánaðar og landsmenn geta einnig hlustað á lögin á vefslóðinni www.ruv.is/Poppland. Þar geta hlustendur sömuleiðis greitt sínu uppáhaldslagi atkvæði. Sjálf úrslitin verða kunngjörð í þættinum Popplandi á Rás 2 föstudaginn 4. júní nk. Sigurlagið verður svo flutt á Hátíð hafsins á Grandagarði, Sjómannadagshelgina 5. til 6. júní nk., og mun það væntanlega hljóma ótt og títt í útvarpi allra landsmanna í allt sumar. Í hlut sigurvegarins kemur 100 þúsund króna vöruúttekt í Krónunni þannig að auk heiðursins af því að sigra í keppninni, er eftir töluverðu að slægjast.

Eggert Benedikt Guðmundsson, forstjóri HB Granda, segir að ákveðið hafi verið að vera bakhjarl sjómannalagakeppninnar þegar eftir því var leitað.

„Við höldum sjómannadaginn hátíðlegan á margvíslegan hátt. Við höldum árshátíð okkar kvöldið fyrir sjómannadaginn, enda er það eina helgin, sem allir okkar sjómenn hafa tækifæri til að mæta. Þá tökum við virkan þátt í Hátíð hafsins hér úti á Granda. Við vorum með opið hús í fyrra og verðum aftur með það í ár. Konurnar í Slysavarnafélaginu munu sjá okkur fyrir veitingum, sem veittar verða gestum og gangandi í boði HB Granda. Okkur fannst tilvalið að gerast bakhjarl sjómannalagakeppninnar og hlökkum mikið til að heyra lögin,“ segir Eggert Benedikt Guðmundsson.

Nýjustu fréttir

Allar fréttir