FréttirSkrá á póstlista

29.12.2009

Góð aukning í bolfiskvinnslunni á Akranesi

Á þessu ári hafa alls um 3.800 tonn af bolfiski farið til vinnslu í fiskiðjuveri HB Granda á Akranesi. Magnið er mun meira en áætlanir gerðu ráð fyrir og hefur starfsmönnum verið fjölgað í samræmi við aukin umsvif. Í byrjun árs voru 25 starfsmenn í vinnu hjá HB Granda á Akranesi en þeir eru nú um 40 talsins.

Að sögn Torfa Þ. Þorsteinssonar, framleiðslustjóra HB Granda, var vinnsla á  þorski aukin að nýju í fiskiðjuverinu á Akranesi á þessu ári og alls hafa um 3.200 tonn af þorski verið unnin þar á árinu. Vinnsla á ufsa nemur um 600 tonnum.

,,Það var aukið við þorskkvótann í janúar sl. og það skilaði sér strax í auknum umsvifum í landvinnslunni á Akranesi. Fjöldi starfsmanna er í dag 40 en var í byrjun árs 25.  Ekkert hlé varð á vinnslunni í sumar. Við réðum 15 námsmenn til starfa yfir hásumarið og allt voru þetta ákaflega dugleg ungmenni sem við vonumst til að fá aftur til vinnu á næsta ári,“ segir Torfi en það segir sennilega mest um kraftinn og ganginn í vinnslunni á Akranesi að þar hefur ekki fallið niður vinna í einn einasta dag á þessu ári vegna hráefnisskorts.

,,Það var mjög mikið að gera í sumar sem leið og í júlímánuði var t.d. unnið frá kl. 6 á morgnana og fram til kl. 18 alla virka daga og sömuleiðis var unnið á laugardögum. Starfsmenn hafa sýnt mikinn dugnað og sveigjanleika og alltaf verið tilbúnir að bæta við sig vinnu þegar á þarf að halda. Sala og vinnsla  hefur sömuleiðis gengið mjög vel.  Allir þorskhnakkar eru seldir  ferskir og fara með flugi á markaði á meginlandi Evrópu. Afurðirnar eru seldar á hæsta verði og viðskiptamenn okkar sætta sig ekki við annað en fyrsta flokks vöru.     Ufsavinnslan er einnig stór þáttur í starfseminni á Akranesi. Ufsinn er léttsaltaður og lausfrystur og fer á markað í Brasilíu og Suður-Evrópu.“

Starfsemi liggur nú niðri í fiskiðjuverum HB Granda í Reykjavík og á Akranesi vegna jólahátíðarinnar. Að sögn Torfa verður tíminn nýttur í Reykjavík til að setja upp nýja flæðilínu, nýjan dælukút fyrir frystikerfið og ýmsar aðrar lagfæringar á húsnæði, tækjum og búnaði.  Einnig verður tekin í notkun ný 400 fermetra umbúðageymsla sem er í mun stærra húsi sem áður var notað sem mjölgeymsla. Á Akranesi verður ráðist í töluverðar lagfæringar á vinnslulínum . Bætt verður við niðurskurðarvél og flokkara og pökkunaraðstaða verður endurbætt.  Einnig verða gólf lagfærð og tækifærið notað til að sinna annarri viðhaldsvinnu.

 ,,Við tókum upp svokallað IFS gæðakerfi á Akranesi á þessu ári en það er alþjóðlegt gæðakerfi (International Food Standard) sem felur i sér að allt sem viðkemur vinnslunni, s.s. hreinlæti, umgengni, rekjanleiki og skráningar svo fátt eitt sé nefnt, þarf að uppfylla mjög stranga staðla.  Erlendur úttektaraðili mun taka gæðakerfið út í byrjun næsta árs en við höfum stuðst við sama kerfi í Norðurgarði í Reykjavík nokkur undanfarin ár. Því má segja nú sé komið á samræmt gæðakerfi í landvinnslu bolfisks hjá HB Granda.“

Nýjustu fréttir

Allar fréttir