FréttirSkrá á póstlista

08.12.2009

Vona að besti veiðitíminn á gulldeplu sé framundan

Hlé er nú á gulldepluveiðum skipa HB Granda. Skipin komu til hafnar sl. laugardag og þar sem að veðurspáin gerir ráð fyrir kröppum lægðum við suðurströnd landsins, var ákveðið að bíða með það í nokkra daga að fara að nýju á miðin.

Að sögn Guðmundar Hannessonar, verksmiðjustjóra HB Granda á Akranesi, hefur vinnsla á gulldeplu gengið með miklum ágætum í vetur.

,,Við vorum í smávægilegum vandræðum með fyrstu tvo farmana sem við fengum þar sem að skipin voru þá úti í fjóra til fimm daga í senn en okkar reynsla er sú að veiðiferðirnar megi ekki standa mikið lengur en þrjá daga til þess að ferskleiki aflans haldist sem mestur. Ef hráefnið er ferskt þá er auðvelt að vinna það,“ segir Guðmundur en samkvæmt upplýsingum hans hefur verksmiðjan á Akranesi á síðustu þremur vikum tekið á móti rúmlega 2.100 tonnum af gulldeplu og rúmlega 4.530 tonnum af íslenskri sumargotssíld.

Framundan er nú sá tími sem einkum eru bundnar vonir við að veiði á gulldeplu geti farið að glæðast. Í fyrra var það upp úr miðjum desember sem sjómenn fóru að verða varir við gulldeplan þétti sig í stærri og veiðanlegri torfum. Mest var veiðin svo eftir áramótin.

Nýjustu fréttir

Allar fréttir