FréttirSkrá á póstlista

06.10.2009

Ingunn AK tók þátt í rannsóknum á gönguleiðum makríls

Fjögur íslensk tog- og nótaskip hafa undanfarna daga tekið þátt í makrílrannsóknum fyrir Austur- og Suðausturlandi sem skipulagðar eru af Hafrannsóknastofnun. Meðal skipanna er Ingunn AK, sem HB Grandi gerir út, og lauk skipið yfirferð sinni í nótt sem leið að sögn Vilhjálms Vilhjálmssonar, deildarstjóra uppsjávarsviðs HB Granda.

Alls tók áhöfnin á Ingunni átta klukkutímalöng tog nyrst á fyrirframgreindu rannsóknasvæði út af Austfjörðum. Að sögn Vilhjálms varð vart við makríl á nokkrum togstöðvanna auk þess sem nokkur tonn af blandaðri síld komu upp en þar var um að ræða íslenska sumargotssíld og norsk-íslenska vorgotssíld sem héldu sig á sömu togslóðinni. Auk Ingunnar hafa Hoffell SU, Kap VE og Sighvatur Bjarnason VE tekið þátt í þessum rannsóknum.

Samkvæmt lýsingu á rannsóknaverkefninu er markmiðið að fylgjast með því hve makríll dvelur lengi í íslenskri lögsögu á haustin og fylgjast með gönguleiðum hans þegar hann dregur sig til baka á vetursetustöðvarnar í Norðursjó og norðan og vestan Bretlandseyja. Svæðið, sem valið var til rannsóknanna, nær frá landgrunninu fyrir Austur- og Suðausturlandi að mörkum landhelginnar milli 65°30’N og 63°00’N. Líklegt er talið að um þetta svæði muni makríllinn, sem gengið hefur inn á miðin fyrir Suðvestur-, Suður-, Austur- og Norðausturlandi í sumar, ganga er hann hverfur af Íslandsmiðum.

Nýjustu fréttir

Allar fréttir