FréttirSkrá á póstlista

23.09.2009

Úthafskarfavertíðin var frábær búbót

,,Við getum ekki annað en verið mjög ánægðir með veiðar togaranna í sumar. Veiðarnar hafa gengið vel og það á við um svo til allar fisktegundir. Það er helst ýsan, sem gengið hefur treglega að veiða, en hún hefur lítið sést á þeim slóðum sem skipin okkar halda sig aðallega á,“ segir Birkir Hrannar Hjálmarsson, rekstrarstjóri togara HB Granda.

Að sögn Birkis Hrannars er mikil ánægja með það hvernig úthafskarfaveiðarnar þróuðust að þessu sinni.

,,Væntingar voru ekki mjög miklar vegna þess að vertíðin í fyrra var ákaflega döpur, svo ekki sé meira sagt. Undanfarin ár hefur karfinn úti á Reykjaneshryggnum gefið sig til frá því í byrjun maí og yfirleitt hefur veiðin ekki staðið lengur en fram í fyrstu vikuna í júlí. Að þessu sinni voru veiðarnar stundaðar fram að mánaðamótum júlí og ágúst en þá luku skipin okkar við að veiða úthlutaðan kvóta. Við vorum með fjögur skip á þessum veiðum og heildaraflinn varð tæplega 6.800 tonn. Þetta er frábær búbót og vonandi benda aflabrögðin til þess að ástand stofnsins sé gott.“

Að lokinni úthafskarfavertíðinni fór Venus HF til veiða í rússneskri og síðan norskri lögsögu í Barentshafi og lauk við að veiða botnfiskkvóta HB Granda þar.

Frystitogarar HB Granda eru nú á veiðum fyrir vestan landið og á Vestfjarðamiðum og að sögn Birkis Hrannars hafa veiðarnar gengið þokkalega utan hvað minna er um ýsu en á sama tíma í fyrra.

,,Togararnir eru þarna í blönduðum afla. Það er minna um ýsu en á sama tíma í fyrra og það bætir ekki úr skák að það er mikill þorskur á miðunum og það gerir okkur mun erfiðara um vik við að sækja í ýsuna og ufsann.“

Vel hefur einnig gengið hjá ísfisktogurum félagsins. Birkir Hrannar segir að veiðarnar séu í nokkuð föstum skorðum.

,,Þeir byrja í karfa og ufsa fyrir sunnan og fara svo vestur til að taka þorskskammtinn sinn sem er þetta frá 25 tonnum og upp í 40 tonn í túr. Að jafnaði hefur sá afli náðst á innan við sólarhring enda vefst það ekki fyrir mönnum að veiða þorsk. Mesti vandinn er að forðast hann þegar verið er að veiða aðrar fisktegundir,“ segir Birkir Hrannar Hjálmarsson.

Nýjustu fréttir

Allar fréttir