FréttirSkrá á póstlista

30.08.2009

Framkvæmdum á Vopnafirði miðar vel

Framkvæmdum við nýja fiskmjölsverksmiðju HB Granda á Vopnafirði miðar vel og að sögn Sveinbjörns Sigmundssonar verksmiðjustjóra eru þær á áætlun. Nú er búið að steypa um helming verksmiðjugólfsins og nú í lok vikunnar var von á fyrstu flutningabílunum sem flytja stálgrindina í verksmiðjuhúsið til Vopnafjarðar.

,,Hugmyndin var sú að ljúka við að steypa verksmiðjugólfið á föstudag en það frestaðist vegna rigningar og spáin var allt annað en hagstæð. Sem betur fer gerði norðvestanátt og þá rignir ekki hér á Vopnafirði. Því er steypuvinna í fullum gangi og vonandi verður lokið við að steypa verksmiðjugólfið um helgina,” segir Sveinbjörn en að hans sögn er grunnflötur verksmiðjuhússins um 1.200 fermetrar. Steypuvinnu við húsið, sem hýsa mun stjórnstöð verksmiðjunnar, skrifstofur, rannsóknastofu og starfsmannarými, er að mestu lokið.

,,Nú er verið að setja upp stálgrind fyrir þjónustuhús, sem verður ofan á mjöltönkunum, og lyftuhús og eftir helgi verður hafist handa við að reisa stálgrindina í sjálfu verksmiðjuhúsinu. Samhliða því verða ýmis stór tæki, sem voru í verksmiðju Faxamjöls í Reykjavík, flutt inn á verksmiðjugólfið,” segir Sveinbjörn Sigmundsson.

Þess má geta að það er Héðinn hf. sem hefur yfirumsjón með framkvæmdunum á Vopnafirði en meðal undirverktaka eru Mælifell ehf. á Vopnafirði, sem sér um alla steypuvinnu, og ES vinnuvélar en það fyrirtæki hefur séð um allar jarðvegsframkvæmdir á byggingarsvæðinu.

Nýjustu fréttir

Allar fréttir