FréttirSkrá á póstlista

27.08.2009

60 þúsund þorskar í eldi í Berufirði

Á dögunum fékk fiskeldi HB Granda í Berufirði 27 þúsund þorskseiði frá Stofnfiski sem komið hefur verið fyrir í eldiskvíum í firðinum. Þetta er annar seiðaskammturinn í sumar því í júnímánuði voru sett út 23 þúsund seiði. Fyrir voru í eldi um 10 þúsund þorskar þannig að alls eru nú í stöðinni um 60 þúsund fiskar.

Að sögn Kristjáns Ingimarssonar, forstöðumanns fiskeldis HB Granda, var þyngd seiðanna frá Stofnfiski um 150 grömm að jafnaði en sá þorskur, sem fyrir var í eldiskvíum, er áætlaður vera um 600 til 700 grömm að þyngd. Þorski var síðast slátrað á vegum HB Granda í lok síðasta árs og segir Kristján að fiskurinn, sem nú er í eldiskvíunum, verði væntanlega ekki kominn í sláturstærð fyrr en í lok næsta árs.

,,Það hefur gengið ágætlega í sumar. Þetta er tilraunaverkefni og það sem við horfum einkum til núna er að leita leiða til að draga úr afföllum á fiski í eldiskvíunum. HB Grandi tekur þátt í samstarfsverkefni á því sviði með Gunnvöru, Stofnfiski og Matís og er fyrstu niðurstaðna að vænta í lok næsta árs,” segir Kristján en hann upplýsir að aðallega sé horft til tveggja þátta í því sambandi, þ.e.a.s. útsetningartímans og stærð þorskseiðanna þegar þau fara í eldiskvíarnar.

,,Þetta eru þeir þættir í eldinu sem auðveldast er að stjórna. Þá má nefna að nú þegar við fengum seinni seiðaskammtinn þá flokkuðum við lökustu seiðin frá og settum aðeins út bestu og lífvænlegustu seiðin. Þetta gefur okkur tækifæri til að bera saman afföllin á þessum tveimur seiðahópum,” segir Kristján.

Svo sem að framan greinir var þorski síðast slátrað hjá fiskeldi HB Granda í lok síðasta árs og segir Kristján að sá fiskur hafi komið mjög vel út í vinnslu.

,,Þorskurinn hefði þó að ósekju mátt vera stærri. Úr því rætist vonandi með tímanum. Þetta er kynbótaverkefni og með því að velja stærstu þorskana til undaneldis, ætti að vera hægt að fá fisk sem vex hraðar og verður stærri án þess að fóðurkostnaður aukist,” segir Kristján Ingimarsson.

Nýjustu fréttir

Allar fréttir