FréttirSkrá á póstlista

02.07.2009

Tveggja ára loðna fyrir norðan og vaðandi makríll fyrir vestan land

Loðnutorfur fyrir norðan land og vaðandi makríll vestan við landið hljóta að teljast góðar fréttir fyrir íslenskan sjávarútveg. Hvort tveggja mun eiga við rök að styðjast að sögn Vilhjálms Vilhjálmssonar, deildarstjóra uppsjávarveiðisviðs HB Granda.

,,Við höfum haft af því spurnir að færeyska skipið Norðborg, sem er við veiðar á norsk-íslensku síldinni, hafi að undanförnu leitað að síld í veiðanlegu magni fyrir norðan land, innan íslensku landhelginnar. Ekki vantar að síld er að finna á mjög stóru svæði en hún hefur verið mjög dreifð og í lítt veiðanlegu magni. Góðu fréttirnar eru hins vegar þær að skipið hefur rekist á nokkrar ágætar loðnutorfur og benda sýni úr aflanum til þess að um sé að ræða tveggja ára loðnu eða sama árgang og væntanlega mun koma til með að bera upp veiðina á næstu vertíð,” segir Vilhjálmur en hann segir einnig að fréttir af makrílgengd fyrir vestan landið veki mönnum bjartsýni.

 ,,Við höfum það eftir Birgi Stefánssyni á Hval 9, að áhöfn skipsins hafi orðið vör við mikið af makríl vestur af landinu, allt frá fjöru og langt út á haf. Veiðar í flottroll eru bannaðar á þessu svæði og því ekki um það að ræða að makríllinn komi í togveiðarfæri en við höfum spurnir af því að trillukarlar hafi verið að fá makríl á handfæri við Hellnanes,” segir Vilhjálmur Vilhjálmsson.

Í framhaldi af þessum fréttum hafði tíðindamaður heimasíðunnar samband við Guðmund Óskarsson, fiskifræðing hjá Hafrannsóknastofnun, og spurðist fyrir um það hvort fregnir af loðnugengd fyrir Norðurlandi og makrílgengd fyrir Vesturlandi hefðu borist stofnuninni. Að sögn Guðmundar hafði hann ekki heyrt um loðnugengdina fyrir norðan en hann útilokaði ekki að fréttir þar að lútandi hefðu borist Þorsteini Sigurðssyni fiskifræðingi sem nú væri í sumarleyfi. Hins vegar hefðu nokkrar ábendingar um vaðandi fisk út af Breiðafirði og Faxaflóa borist til Hafrannsóknastofnunar að undanförnu.

,,Við erum að fara í síldarleiðangur á Bjarna Sæmundssyni RE á morgun, m.a. til að kanna ástand íslensku sumargotssíldarinnar og hugsanlega útbreiðslu sýkingarinnar sem vart varð við á síðustu vertíð. Fyrstu viðbrögðin við ábendingum um vaðandi fisktorfur hér vestan við landið voru þau að þar væri síld á ferðinni en þar gæti allt eins verið um makríl að ræða. Þetta verður skoðað á næstunni en næsti loðnuleiðangur er ekki fyrirhugaður fyrr en í nóvember nk.,” sagði Guðmundur Óskarsson.

Nýjustu fréttir

Allar fréttir