FréttirSkrá á póstlista

11.05.2009

Kolmunnavinnslan gekk mjög vel á Vopnafirði

Það sem af er árinu hefur fiskmjölsverksmiðja HB Granda á Vopnafirði tekið á móti alls tæplega 18.000 tonnum af hráefni. Munar þar mest um 11.000 tonn af kolmunna sem barst að landi á rúmlega þriggja vikna tímabili frá 12. apríl til 3. maí sl.

Sveinbjörn Sigmundsson, verksmiðjustjóri á Vopnafirði, segir ekki annað hægt en að vera ánægður með árangurinn.

,,Auðvitað var loðnuveiðibannið mikið áfall. Við tókum einungis á móti um 3.000 tonnum af loðnu, sem veiddust af svokölluðum tilraunakvóta, og að auki fengum við um 1.000 tonn af gulldeplu til bræðslu. Það voru hins vegar kolmunnaveiðarnar sem skiptu okkur mestu máli. Við byrjuðum kolmunnavinnsluna á páskadag og að undanskildum einum sólarhring þá var verksmiðjan keyrð á fullum afköstum fram til 3. maí,” segir Sveinbjörn en að hans sögn gekk kolmunnavinnslan mjög vel.

Svo, sem greint hefur verið frá hér á heimasíðunni, þá voru síðustu dagarnir í kolmunnavinnslunni notaðir til að prufukeyra nýjan rafskautaketil í fiskmjölsverksmiðjunni. Sveinbjörn segir að sá búnaður lofi mjög góðu.

,,Það að nota raforku í stað svartolíu við vinnsluna hefur svo sem engin áhrif á nýtingu eða gæði afurðanna en við sjáum fram á töluverðan sparnað vegna þessarar breytingar og svo hefur það auðvitað mikið að segja að verulega mun draga úr losun svokallaðra gróðurhúsalofttegunda.”

Nú er unnið að hefðbundnum viðhaldsverkefnum í fiskmjölsverksmiðjunni á Vopnafirði auk þess sem verið er að fínstilla vinnslubúnaðinn. Sveinbjörn og hans menn verða því tilbúnir til að hefja vinnslu á norsk-íslensku síldinni af krafti þegar þær veiðar hefjast í næsta mánuði.

Nýjustu fréttir

Allar fréttir