FréttirSkrá á póstlista

28.04.2009

HB Grandi meðal þátttakenda á sjávarútvegssýningunni í Brussel

Í morgun voru sjávarútvegssýningarnar European Seafood Exposition (ESE) og Seafood Processing Europe (SPE) í Brussel í Belgíu opnaðar formlega. HB Grandi hefur tekið þátt í ESE-sýningunni frá árinu 2005 og hefur þátttakan þar verið stór liður í starfi félagsins við að taka markaðssetningu sinna afurða i eigin hendur. Sýningarbás HB Granda er í sýningarhöll 6 og er hann númer 839-1. Meðal þeirra góðu gesta, sem heimsóttu sýningarbásinn í morgun, voru Stefán Haukur Jóhannesson, sendiherra Íslands í Brussel, og Guðríður Margrét Kristjánsdóttir, ráðgjafi í sjávarútvegsmálum við sendiráðið.

Sjávarútvegssýningarnar í Brussel verða næstu þrjá dagana í sviðsljósi fjölmiðla en búist er við því að gestir frá meira en 150 þjóðlöndum sæki sýningarnar heim. Sýningarnar eru jafnan vettvangur alls hins besta og framsæknasta sem sjávarútvegsfyrirtæki heimsins og fyrirtækja sem þjónusta sjávarútveginn hafa upp á að bjóða. Í ár taka rúmlega 700 fyrirtæki þátt í ESE-sýningunni og sýnendur á SPE sýningunni, sem er vettvangur véla- og tækjaframleiðenda, eru rúmlega 200 talsins frá 22 löndum.

,,Sjávarútvegssýningin í Brussel er mikilvægasta sýning sinnar tegundar og sú langstærsta sem haldin er í heiminum í dag. Reynsla okkar af þátttöku í ESE-sýningunni er mjög góð og við verðum nú með fimmta árið í röð,” segir Svavar Svavarsson, markaðsstjóri HB Granda, en til marks um áhersluna sem félagið leggur á þessa sýningu má nefna að alls eru 12 starfsmenn HB Granda staddir í Brussel og munu þeir nota tækifærið til að ræða við kaupendur á sjávarfangi næstu dagana, afla nýrra viðskiptasambanda og treysta samstarfið við eldri viðskiptavini.

,,Við höfum áður stofnað til nýrra viðskiptasambanda í Brussel eða í kjölfar sýninganna þar og væntum þess að svo verði einnig að þessu sinni,” segir Svavar Svavarsson.

Nýjustu fréttir

Allar fréttir