FréttirSkrá á póstlista

05.02.2009

Ágætis karfaveiði miðað við árstíma

,,Þetta var að mörgu leyti hin ágætasta veiðiferð. Við vorum að veiðum vestan við landið og vorum aðallega í karfa en fengum einnig þó nokkuð af þorski og dálítið af grálúðu. Það var reyndar mesta furða hve karfaveiðin var góð því janúarmánuður hefur aldrei þótt sérstaklega góður tími á þeim veiðum,“ segir Kristinn Gestsson, skipstjóri á Þerney RE, en skipið kom til hafnar í Reykjavík í nótt sem leið eftir 33 daga veiðiferð.

Að sögn Kristins fengust um 770 tonn af fiski upp úr sjó í veiðiferðinni og þar af voru rúmlega 500 tonn af karfa og þá aðallega gullkarfa. Í afurðum talið nam aflinn 530 tonnum og aflaverðmætið losaði 130 milljónir króna.

,,Við vorum aðallega á Hampiðjutorginu og í Skerjadjúpinu og undir venjulegum kringumstæðum hefðum við verið á höttunum eftir ufsa og ýsu á þessu árstíma. Það var hins vegar óvenju lítið af þeim tegundum að þessu sinni. Það er eins og að ýsan hafi fært sig í auknum mæli norðar með hlýnandi sjó og þá spilar það líka inn í ýsuveiðina að menn spara við sig þorskinn um þessar mundir en það veiðist jafnan þó nokkuð af ýsu með þorskinum. Hvar ufsinn heldur sig, vitum við ekki,“ segir Kristinn Gestsson.

Nýjustu fréttir

Allar fréttir