FréttirSkrá á póstlista

03.12.2008

Síldveiðunum stjórnað frá degi til dags

,,Það er ekki hægt að gera neinar langtímaáætlanir heldur er veiðunum stjórnað frá degi til dags. Útbreiðsla sýkingarinnar í síldinni virðist vera mikil og þannig fréttist t.d. af sýktri síld á Steingrímsfirði í gærmorgun,“ segir Vilhjálmur Vilhjálmsson, deildarstjóri uppsjávarsviðs HB Granda, en óhætt er að fullyrða að sníkjudýrið Iktíófónus, sem veldur sýkingu í íslensku sumargotssíldinni, hefur svo sannarlega sett síldveiðar landsmanna í uppnám nú þegar búið er að veiða um tvo þriðju heildarkvótans á vertíðinni.

Að sögn Vilhjálms fékk Ingunn AK um 1.600 tonn af síld á Breiðafirði í gær og er verið að landa þeim afla til bræðslu á Akranesi. Faxi RE og Lundey NS eru nú á miðunum.

,,Það er erfitt að meta stöðuna og vísindamenn virðast ekki eiga auðveldara með það en aðrir. Spurningar, sem vakna, eru m.a. þær hvaða áhrif hefur það til framtíðar ef 40% af síldinni í Breiðafirði eru sýkt og síldin drepst þar eins og talið er hugsanlegt. Í fyrra mældi Hafrannsóknarstofnun 770 þúsund tonn af síld inni í Breiðafirði. Sé um svipað magn að ræða nú gætu því um 300 þúsund tonn af sýktri síld botnfallið þar. Áhrif þess á lífríkið geta varla verið jákvæð því talið er að sýkillinn muni lifa áfram,“ segir Vilhjálmur.

Talið er að síldin sýkist í gegnum æti, þ.e.a.s. að krabbadýr sem hún étur, geymi sýkilinn. Óvíst er hvort smit berist með öðrum leiðum en þó er talið að mikill þéttleiki ýti undir hraða útbreiðslunnar. Fram hefur komið að í fyrri staðfestum dæmum um sýkingu af völdum sama sníkjudýrs erlendis að þar hafa faraldrarnir jafnan staðið í um tvö ár í senn.

Nýjustu fréttir

Allar fréttir