FréttirSkrá á póstlista

16.07.2008

Reynslan af parveiðunum er góð

,,Við erum ánægðir með árangurinn og reynslan af því að tvö skip séu saman með eitt troll er góð að mínu mati. Helsti kosturinn er e.t.v. sá að fiskurinn fælist síður þegar skipin eru sitt hvoru megin við torfuna með trollið á milli. Þegar togað er á hefðbundinn hátt þarf  maður að byrja á að sigla yfir torfurnar, sem oft eru alveg uppi undir yfirborðinu, áður en trollið kemst að fisknum,“ segir Albert Sveinsson skipstjóri á Faxa RE í samtali við heimasíðu HB Granda.

Faxi RE kom til Eskifjarðar í morgun með um 1400 tonna afla sem landað var til bræðslu hjá fiskmjölsverksmiðjunni á staðnum. Aflinn fékkst á veiðum með Ingunni AK en áður en Faxi RE fór af miðunum voru tekin tvö hol með Lundey NS sem nú er að veiðum með Ingunni AK. Aflinn í þeim var um 350 tonn.

Að sögn Alberts var farið vítt og breitt um veiðisvæðið fyrir austan landið í veiðiferðinni en síðustu hölin voru tekin á Rauða torginu.

,,Þetta er mjög stórt svæði og flotinn hefur verið mjög dreifður. Sumir hafa verið að veiðum í færeysku lögsögunni en við fórum lengst út undir miðlínuna í veiðiferðinni. Það er erfitt að finna síldina. Torfurnar eru pínulitlar og fiskurinn er á mikilli ferð í ætisleit. Stefnan virðist þó aðallega vera í norður- eða norðausturátt og það kemur s.s. ekki á óvart,“ segir Albert en að hans sögn er töluvert um makríl á veiðislóðinni en misjafnt er hve hlutfall hans í heildaraflanum er mikill. Albert segir að í góðvirði og spegilsléttum sjó á dögunum hafi verið gaman að fylgjast með makrílnum vaða í yfirborðinu en það sama geri síldin einnig.Sá háttur er hafður á við veiðar tveggja skipa með einu trolli að sá skipstjórinn,  sem kastar, stýrir jafnan holinu. Öll íslensku síldveiðiskipin eru nú á parveiðum, eða tvö saman með eitt troll, utan hvað Huginn VE er einn að veiðum með sérútbúnu trolli. Sams konar troll er um borð í Ingunni AK og taldi Albert líklegt að það yrði reynt fljótlega og um leið myndi þá fást betri samanburður á því hverju parveiðarnar eru að skila með tilliti til olíukostnaðar.

Nýjustu fréttir

Allar fréttir