Um HB Granda

HB Grandi hf. á sér langa sögu og býr að mikilli reynslu og þekkingu á nýtingu auðlinda og framleiðslu sjávarafurða sem endurspeglast í öllu starfi þess. Lögð er rík áhersla á háþróaða tækni við veiðar og vinnslu og stöðuga þróun framleiðslunnar. Fyrirtækið framleiðir verðmætar afurðir úr ferskum fiski sem aflað er úr hafinu við Ísland. Virðing fyrir umhverfinu og lífríki sjávar er grundvöllur starfsemi HB Granda og lögð er áhersla á góða umgengni um auðlindina og ábyrgar fiskveiðar svo komandi kynslóðir geti notið hennar áfram. HB Grandi leggur áherslu á samfélagslega ábyrgð enda hefur það ætíð verið metnaður fyrirtækisins að öll starfsemi þess endurspegli ábyrgð gagnvart auðlindum sjávar og samfélaginu. 
 
HB Grandi stundar veiðar og vinnslu á botn- og uppsjávarfiski. Hjá fyrirtækinu eru unnin um 950 ársverk til sjós og lands. Afurðirnar eru seldar um allan heim en helstu markaðir eru í Evrópu, Asíu, Norður-Ameríku og Afríku.
HB Grandi er með samþættan rekstur veiða, vinnslu og markaðssetningar sem stuðlar að skilvirkari framleiðslu og tryggir óhefta leið aflans til kaupanda. Auðvelt er að rekja slóð afurðanna frá afhendingu alla leið aftur til sjávar. Lykillinn að velgengni fyrirtækisins felst í framúrskarandi starfsfólki á sjó og landi sem leggur sig fram við að skila gæðavörum til kaupenda og neytenda.

Vinnustaðurinn

HB Grandi er sjávarútvegsfyrirtæki með starfsstöðvar í Reykjavík, á Akranesi og Vopnafirði. Aðalskrifstofur HB Granda eru við Norðurgarð í Reykjavík. Þar er yfirstjórn botnfisk- og uppsjávarsviðs staðsett ásamt fjármála- og markaðssviði.
Reynsla og þekking í nýtingu auðlindar og framleiðslu sjávarafurða endurspeglast í öllu starfi fyrirtækisins. Hlutverk starfsfólks spannar alla virðiskeðjuna, þ.e. veiðar, vinnslu, sölu og dreifingu á afurðum félagsins. HB Grandi leggur áherslu á að innan fyrirtækisins starfi hæft og traust starfsfólk sem af fagmennsku og ábyrgð tryggir sjálfbæra nýtingu og hagkvæmni í umgengni við auðlindina. HB Grandi er traustur vinnustaður þar sem stjórnendum og starfsmönnum er annt um vellíðan og heilbrigði samstarfsfólks síns. HB Grandi er fjölskylduvænn vinnustaður þar sem leitast er við að hafa gott vinnuskipulag varðandi frítíma og jafnvægi milli fjölskyldu og einkalífs. HB Grandi er jafnréttissinnaður vinnustaður þar sem leitast er við að fá jafnt karla og konur til starfa í hinum ólíku starfahópum vinnustaðarins. 




Starfsstöðvar

 


Aðalskrifstofa
HB Grandi Reykjavík

Norðurgarður 1
101 Reykjavík

Sími 550 1000

HB Grandi Akranesi

Bárugötu 8-10
300 Akranes

Sími 550 1000

HB Grandi Vopnafirði

Hafnarbyggð 7
690 Vopnafirði

Sími 550 1000

Skipurit HB Granda


Þúfa

Árið 2013 efndi HB Grandi, í samstarfi við Samband íslenskra listamanna og Faxaflóahafnir, til samkeppni um nýtt listaverk til að prýða umhverfið við Ísbjörninn, nýja frystigeymslu félagsins sem byggð var sama ár. Fyrir valinu var verkið Þúfa eftir listakonuna Ólöfu Nordal. 

Samkvæmt listamanninum er Þúfa manngert átta metra grasivaxið fjall sem hægt er að ganga upp á eftir þar til gerðum stíg. Á toppnum trónir fiskihjallur þar sem þurrkaður er fiskur. Þúfa er brú á milli náttúru og borgar. Verkinu er ætlað að virka bæði í nálægð og fjarlægð og sést það víða að í borginni. Þeir sem ganga upp á toppinn fá að njóta eins tilkomumesta útsýnis yfir Reykjavík sem völ er á. Verkið virkjar öll skilningarvitin og hefur yfir sér hlýju og kunnugleika. Formgerð Þúfunnar er ónáttúruleg enda manngert fjall á manngerðu landi.

Jarðvegur úr grunni Ísbjarnarins og sprengigrjót úr holtinu við Hlemm mynda kjarna fjallsins. Til að byggja upp mikinn halla þess reyndist besta aðferðin vera strenghleðsla sem er ævaforn byggingaraðferð þar sem torfi og grjóti er raðað á víxl og myndar afar sterkan vegg. Hjallurinn efst er gerður úr rekaviði. Landið sem Þúfa er reist á er landfylling og er því um ónumið manngert land að ræða - land án ,,náttúrulegrar náttúru‘‘, menningar eða sögu. Starfsmenn HB Granda eru
hinir nýju landnemar. Í vinnslusal félagsins við Norðurgarð vinnur fólk sem kemur alls staðar að úr heiminum, frá öllum
heimsálfum, alið upp við margs konar menningu og trúarbrögð. 

Meginmarkmiðið í hugmyndavinnu Þúfu var að gera verk sem hefði sameiginlega skírskotun í mannlega og menningarlega hætti. 

Þúfa var vígð við hátíðlega athöfn þann 21. desember 2013.

Ísbjörninn

Á Sjómannadaginn 2013 var ný frystigeymsla við húsnæði HB Granda á Norðurgarði vígð við hátíðlega athöfn. Efnt var til nafnasamkeppni á meðal starfsmanna og bar nafnið Ísbjörninn sigur úr býtum. Nafnið hefur skírskotun í sögu félagsins þar sem fyrirtækið Ísbjörninn var eitt af þeim fyrirtækjum sem nú mynda HB Granda. Ísbjörninn er alls 3.800 fermetrar, þar af er frystigeymslan 2.600 fermetrar og getur hýst allt að 6.000 tonn af frystum afurðum.

Frystigeymslan bætti úr brýnni þörf fyrir frystirými en með byggingu hennar er staða gömlu hafnarinnar í Reykjavík styrkt sem fiski- og fiskvinnsluhöfn.

Svanur

Í nóvember 2015 var ný flokkunarstöð HB Granda opnuð við hátíðlega athöfn. Flokkunarstöðin fékk nafnið Svanur en það vísar bæði í útgerðarfélagið Svan sem rann saman við HB Granda árið 2004, auk þess sem svanurinn er norrænt umhverfismerki. Flokkunarstöðin er 240 fm á stærð og er staðsett á lóð HB Granda í Reykjavík. Tilgangur með starfsemi hennar er að safna saman og flokka sorp sem fellur til á athafnasvæði félagsins í Reykjavík og frá þeim skipum sem landa þar og er gert ráð fyrir að hægt sé að komast hjá því að urða um 40% af almennu sorpi og um 70% af grófu sorpi.

Í fjögur ár hefur HB Grandi einnig flokkað allt sorp sem fellur til á Vopnafirði og hefur reynslan verið mjög góð. Félagið hefur m.a. fengið viðurkenningu frá Hringrás fyrir að starfrækja fyrirmyndarfyrirtæki í umhverfismálum á Vopnafirði.