Gullkarfinn er veiddur af ísfisk- og frystitogurum HB Granda allt árið um kring en oft veiðist mest síðla vetrar. Bestu miðin eru vestur og suðvestur af landinu. Karfinn er unninn um leið og hann kemur um borð í frystitogarana og er hann ýmist hausskorinn eða flakaður og lausfrystur. Í ísfisktogurum fyrirtækisins er karfinn ísaður i kör og honum haldið kældum til að varðveita hráefnisgæðin fyrir frekari vinnslu í landi. Landvinnsla karfa fer fram í fiskiðjuveri fyrirtækisins og er hann flakaður, stærðarflokkaður og frystur eftir ströngustu gæðakröfum. HB Grandi selur einnig fersk kæld karfaflök sem send eru samdægurs með flugi á markaði í Evrópu.